Finlandiya Avropa qitəsində nüvə çəkindirmə mexanizminin gücləndirilməsi məqsədilə Fransa tərəfindən irəli sürülmüş təşəbbüsdə iştirak etmək qərarına gəlib.

Oxu.Az xəbər verir ki, bu barədə Finlandiyanın Müdafiə Nazirliyinin mətbuat xidməti məlumat yayıb.

Finlandiyanın müdafiə naziri Antti Hyakkyanen bildirib ki, sözügedən ikitərəfli əməkdaşlıq həm ölkənin, həm də bütövlükdə Avropanın təhlükəsizliyinin artırılmasına xidmət edəcək.

“Fransanın təşəbbüsünə qoşulmağımız bu ölkə ilə müdafiə sahəsində ikitərəfli əlaqələrimizi əhəmiyyətli dərəcədə dərinləşdirəcək və Finlandiyanın təhlükəsizliyini daha da möhkəmləndirəcək. Yaxın müttəfiqlərimiz olan İsveç, Danimarka və Norveçin artıq bu layihədə yer alması baxımından bizim bu addımımız olduqca təbiidir”, – deyə nazir qeyd edib.

Nazirliyin bəyanatında vurğulanır ki, yeni təşəbbüs NATO-nun nüvə çəkindirmə qüvvələrini əvəz etmir və alyansda olduğu kimi, kollektiv müdafiə öhdəlikləri yaratmır. İştirakçı dövlətlər prosesə cəlb olunma dərəcələrini müstəqil şəkildə müəyyənləşdirirlər və Fransa onlardan öz nüvə qüvvələrinin saxlanılması üçün maliyyə tələb etmir.

Finlandiyanın da iştirakı ilə Fransa tərəfindən təklif edilən bu təşəbbüsə qoşulan ölkələrin ümumi sayı ona çatıb. Mart ayında Fransa Prezidenti Emmanuel Makron Böyük Britaniya, Almaniya, Polşa, Niderland, Belçika, Yunanıstan, İsveç və Danimarkanın bu prosesdə iştirakını elan etmişdi. May ayında isə Norveç layihəyə qoşulmuşdu. Makron 2026-cı ilin martında bu təşəbbüsü irəli sürərək Fransanın nüvə çəkindirməsinin Avropa miqyasını “qabaqcıl” adlandırmışdı.