Diş həkimi Ann Nguyen-Chang Yahoo Health-ə verdiyi açıqlamada bildirib ki, qəhvə içdikdən dərhal sonra dişləri fırçalamaq ağız boşluğunda turşuluğun müvəqqəti artması səbəbindən diş minasına zərər verə bilər. Onun sözlərinə görə, bu hal dişləri mexaniki təsirlərə qarşı daha həssas vəziyyətə salır.

Editor.az xəbər verir ki, diş həkimi bununla bağlı xarici mediaya açıqlama verib.

Mütəxəssisin sözlərinə görə, qəhvənin tərkibində diş minasının səth qatını müvəqqəti yumşalda bilən üzvi turşular mövcuddur. Bu müddətdə dişlərin fırçalanması mikro zədələnmələrə səbəb olaraq qoruyucu təbəqənin tədricən nazilməsinə və diş həssaslığının artmasına gətirib çıxara bilər. Bu səbəbdən qəhvə içdikdən dərhal sonra dişləri fırçalamaq, minanı qorumaq əvəzinə onun aşınmasını sürətləndirə bilər.

Ən ideal yanaşma qəhvə içməzdən əvvəl ağız gigiyenasını təmin etməkdir. Bu, gecə ərzində yaranan bakterial ərpi təmizləyir və qəhvənin piqmentlərinin diş səthinə yapışmasını azaldır. Həmçinin, diş minasının stabilləşməsi üçün diş fırçalama ilə qəhvə içilməsi arasında təxminən 30 dəqiqə fasilə vermək tövsiyə olunur.

Əgər əvvəlcədən dişlərinizi fırçalamaq mümkün deyilsə, qəhvə içdikdən sonra ağzınızı su ilə yaxalamaq məsləhət görülür. Bu, turşuluğun azalmasına və ləkə yaradan bəzi maddələrin uzaqlaşdırılmasına kömək edərək diş minasına mənfi təsiri minimuma endirir.

Mütəxəssis əlavə olaraq uzunmüddətli və həddindən artıq qəhvə istehlakını məhdudlaşdırmağı, şəkər qəbulunu azaltmağı, soyuq içkilər üçün isə pipetdən istifadə etməyi tövsiyə edir. Bu üsul mayenin diş səthi ilə təmasını azaldır. Su, həmçinin şəkərsiz və aşağı turşuluğa malik bitki çayları isə diş minası üçün daha təhlükəsiz alternativ hesab olunur.

//Gülnarə Abasova, Editor.az