Çin Tayvanla diplomatik əlaqələrini davam etdirən Paraqvay və Belizin yüksək vəzifəli rəsmilərinə qarşı sanksiyalar tətbiq edib.

Pekinin qərarı Çinlə Tayvan arasında beynəlxalq təmsilçilik uğrunda mübarizənin Latın Amerikası və Karib hövzəsində də davam etdiyini göstərir.

Pekin iki ölkənin mövqeyinə qarşı çıxır

Editor.az xəbər verir ki, Reuters-in məlumatına görə, Çin Paraqvayın rabitə naziri Qustavo Villate və Belizin xarici işlər naziri Frensis Fonsekaya qarşı məhdudiyyətlər elan edib. Sanksiyalar onların Honkonq və Makaoya səfərlərini qadağan etməyi, eləcə də Çin qurumları ilə əməkdaşlıqlarını məhdudlaşdırmağı nəzərdə tutur.

Pekin Tayvanı öz ərazisinin bir hissəsi hesab edir və adanın müstəqil dövlət kimi beynəlxalq təmsilçiliyinə qarşı çıxır. Çin hakimiyyəti adıçəkilən rəsmiləri Tayvanın maraqlarını müdafiə etməkdə və Çinin daxili işlərinə müdaxilə etməkdə ittiham edib.
Tayvan isə bu addımı digər ölkələrin xarici siyasət seçimlərinə müdaxilə kimi qiymətləndirərək pisləyib. Paraqvay və Beliz Tayvanla diplomatik münasibətlərini davam etdirəcəklərini bildiriblər.

//Samir Qurbanov, Editor.az