Moskva ABŞ-ın vasitəçiliyi ilə Rusiya və Ukrayna arasında sülh danışıqlarının yaxın vaxtlarda yenidən başlamasına ümid etdiyini açıqlayıb.

Editor.az xəbər verir ki, Reuters-in məlumatına görə, Kremlin sözçüsü Dmitri Peskov Moskva ilə Vaşinqton arasında Ukrayna münaqişəsinin həlli istiqamətində əlaqələrin davam etdiyini bildirib. Onun sözlərinə görə, Rusiya danışıqlar prosesinin yenidən aktivləşdirilməsində siyasi iradəyə malikdir.

ABŞ tərəfi də danışıqların bərpası üçün mümkün yol xəritəsinin hazırlanması üzərində işləyir. Bununla belə, əsas fikir ayrılıqları hələ də qalır. Ukrayna Rusiyanın ərazi güzəştləri ilə bağlı tələblərini qəbul etmədiyini bildirir.

Moskva və Kiyev arasında danışıqların son aylarda faktiki olaraq dayanmasına baxmayaraq, Vaşinqton prosesin yenidən hərəkətə gətirilməsinə çalışır. Tərəflərin mövqeləri arasında ciddi fərqlər olduğundan yaxın zamanda yekun razılaşmanın əldə olunacağı hələlik gözlənilmir.

//Samir Qurbanov, Editor.az