Almaniya hərbi xidmət yaşında olan bəzi Ukrayna vətəndaşlarına müvəqqəti müdafiə statusunun verilməsi ilə bağlı qaydaları sərtləşdirməyi nəzərdən keçirir.

Məlumata görə, söhbət əsasən 23–60 yaş arası ukraynalı kişilərdən gedir.

Yeni qaydaların tətbiqi halında Ukraynadan qanuni şəkildə çıxış hüququ olmayan şəxslər Avropa İttifaqında avtomatik müvəqqəti müdafiə statusu ala bilməyəcəklər.
Bu şəxslər üçün alternativ olaraq fərdi sığınacaq prosedurundan keçmək tələb oluna bilər. Beləliklə, onların Almaniyada qalmaq hüququ avtomatik deyil, fərdi hüquqi qiymətləndirmə əsasında müəyyənləşdiriləcək.

Almaniyanın daxili işlər naziri Aleksandr Dobrindt hərbi xidmət yaşında olan ukraynalı kişilər üçün mövcud avtomatik müdafiə mexanizminin dəyişdirilməsini dəstəkləyir. Məsələ Avropa İttifaqı səviyyəsində də müzakirə olunur.

Bununla belə, bu qərar Almaniyada yaşayan bütün 23–60 yaşlı ukraynalı kişilərin avtomatik deportasiya ediləcəyi anlamına gəlmir. Hazırkı təşəbbüs əsasən yeni gələn şəxslərin müvəqqəti müdafiə statusuna çıxışının məhdudlaşdırılması ilə bağlıdır.

Avropa İttifaqında Ukraynadan olan şəxslər üçün müvəqqəti müdafiə mexanizmi hazırda qüvvədədir. 2026-cı ilin iyun ayının sonunda Almaniyada bu statusdan yararlanan Ukrayna vətəndaşlarının sayı 1,28 milyondan çox olub.

//Samir Qurbanov, Editor.az