FIFA prezidenti Canni İnfantinonun rəhbərliyinə qarşı Avropadan gələn tənqidlər və dəyişiklik çağırışları güclənir.

Yunanıstan Futbol Federasiyasının prezidenti Makis Qaqatsis və Almaniya millisinin sabiq direktoru Oliver Biyerhoff UEFA-nın İnfantinoya qarşı mövqeyini dəstəkləyən şəxslər arasında yer alıblar.

Narazılığın əsas səbəblərindən biri FIFA daxilində Dünya Çempionatının kommersiya hüquqları ilə bağlı irəli sürülmüş və daha sonra geri götürülmüş təşəbbüslə əlaqələndirilir.

Təklif çərçivəsində dünya çempionatının kommersiya hüquqlarının özəl investorlara satılması imkanının nəzərdən keçirilməsi futbol ictimaiyyətində ciddi mübahisələrə səbəb olmuşdu.

FIFA sonradan bu təşəbbüsdən imtina edib və İnfantino yaranmış vəziyyətlə bağlı üzrxahlıq edib. Buna baxmayaraq, təşkilat daxilində etimad probleminin tam aradan qalxmadığı bildirilir. UEFA və bir sıra digər konfederasiyalar FIFA rəhbərliyində yeni yanaşmanın vacibliyini müdafiə edirlər.

İnfantinonun gələn ilin martında FIFA prezidentliyinə yenidən namizədliyini irəli sürmək niyyətində olduğu bildirilir. Hazırda ona qarşı konkret və rəsmi rəqib namizəd müəyyənləşməyib. Lakin danimarkalı futbol funksioneri Yesper Möllerin alternativ namizədin irəli sürülməsi istiqamətində fəaliyyət göstərdiyi qeyd olunur.

UEFA-nın mövqeyini dəstəkləyən federasiyalar FIFA rəhbərliyində dəyişikliklərin futbolun idarə olunmasına olan etimadı və idmanın bütövlüyünü qorumaq baxımından vacib olduğunu düşünürlər. Qarşıdakı aylarda bu mübarizənin daha da kəskinləşəcəyi və mart ayında keçiriləcək FIFA prezident seçkisinin futbol dünyasının əsas siyasi hadisələrindən birinə çevriləcəyi gözlənilir.

//Samir Qurbanov, Editor.az