Rusiyanın federal büdcəsinin neft-qaz gəlirləri 2026-cı ilin yanvar-iyul aylarında ötən ilin eyni dövrü ilə müqayisədə əhəmiyyətli dərəcədə azalıb.

Rusiya Maliyyə Nazirliyinin məlumatına görə, hesabat dövründə neft-qaz sektorundan büdcəyə daxilolmalar 4,59 trilyon rubl təşkil edib. Bu, 2025-ci ilin eyni dövrü ilə müqayisədə 16,8 faiz və ya təxminən 927 milyard rubl azdır.

Bununla belə, iyul ayında neft-qaz gəlirlərində artım qeydə alınıb. Həmin ayda büdcəyə 934 milyard rubl daxil olub ki, bu da iyun ayındakı 683,6 milyard rubl göstəricidən təxminən 36,6 faiz çoxdur.

Ekspertlər qeyd edirlər ki, iyuldakı artımın əsas səbəblərindən biri neft şirkətlərinin əlavə gəlir vergisi üzrə iri həcmli ödənişlər etməsi olub. Bu vergi ildə yalnız dörd dəfə ödənildiyindən aylıq göstəricilərdə ciddi dəyişiklik yarada bilir.
Ümumilikdə isə ilin əvvəlindən Rusiyanın büdcəsində neft-qaz gəlirlərinin azalması davam edir. Bu dinamika enerji qiymətləri, rublun məzənnəsi və neft-qaz sektorundan əldə olunan vergi daxilolmaları ilə bağlıdır.

//Samir Qurbanov, Editor.az