Böyük Britaniyanın müdafiə rəhbəri Rusiyanın Ukraynaya qarşı genişmiqyaslı müharibəsi başlayandan bəri 500 mindən çox rus hərbçisinin öldürüldüyünü açıqlayıb.

Böyük Britaniya Müdafiə Qərargahının rəhbəri, aviasiya marşalı Riçard Naytonun bildirdiyinə görə, Rusiyanın ümumi hərbi itkisi, o cümlədən yaralılar və digər itkilər nəzərə alınmaqla, təxminən 1,5 milyon nəfərə çatıb.

O, həmçinin Rusiya ordusunun 10 mindən çox zirehli və qorunan hərbi texnika, təxminən 3 min hava hücumundan müdafiə və artilleriya sistemi, eləcə də 370-dən çox təyyarə və helikopter itirdiyini bildirib.

Britaniya rəsmisinin açıqladığı rəqəmlər Ukrayna hərbi mənbələrinin əvvəlki hesablamaları ilə təxminən uyğun gəlir. Bununla belə, Rusiya tərəfi bu məlumatlara dərhal münasibət bildirməyib.

AP-nin məlumatına görə, Rusiya ordusunun say üstünlüyünə baxmayaraq, onun cəbhədə irəliləməsi son dövrlərdə əhəmiyyətli dərəcədə zəifləyib. Paralel olaraq, müharibədə pilotsuz uçuş aparatlarından istifadə daha da intensivləşib.
Ukrayna qüvvələri Rusiyanın neft emalı və logistika obyektlərinə uzaqmənzilli zərbələr endirərkən, Rusiya da Ukraynanın şəhərlərinə və mülki infrastrukturuna qarşı hücumlarını davam etdirir.

//Samir Qurbanov, Editor.az