ABŞ-li milyarder, “SpaceX” şirkətinin qurucusu İlon Mask Ukrayna Prezidenti Volodimir Zelenskinin vəzifədən getməli olduğunu bildirib.

Editor.az-ın məlumatına görə, Mask bu fikri özünün “X” sosial şəbəkə hesabında paylaşaraq Ukrayna liderinin istefasına çağırış edib.

“Qətllər davam edir. Zelenskinin getmək vaxtıdır”, – deyə milyarder paylaşımında yazıb.

Mask eyni zamanda başqa bir “X” istifadəçisinin Zelenski ilə bağlı fikirlərini də yenidən paylaşıb. Həmin istifadəçi Ukrayna Prezidentinin britaniyalı jurnalist Pirs Morqana verdiyi son müsahibəyə münasibət bildirərək onun prezident seçkilərindən yayınmaq məqsədilə hərbi əməliyyatların davam etməsində maraqlı olduğunu iddia edib.

Paylaşımda, həmçinin, Zelenskinin prezidentlik müddəti başa çatdıqdan sonra mümkün hüquqi təqiblərdən narahat olduğu irəli sürülüb. Müəllif öz iddiasını Ukraynanın əvvəlki rəhbərlərinin fəaliyyəti və onların ətrafında yaranmış qalmaqallarla əlaqələndirib.

Bununla belə, Maskın paylaşdığı bu fikirlər digər istifadəçinin iddialarıdır və onların öz-özlüyündə təsdiqlənmiş fakt kimi qəbul edilməsi düzgün deyil.

Milyarderin açıqlaması Ukraynada müharibənin davam etdiyi və ölkənin gələcək siyasi rəhbərliyi ətrafında müzakirələrin aparıldığı bir vaxtda diqqət çəkib.