Ukrayna hərbçilərinin Starlink peyk rabitə sistemindən istifadəsində yaranan məhdudiyyətlər cəbhədə pilotsuz uçuş aparatlarının fəaliyyətinə təsir göstərib.

Bu hadisə Kiyevdə ABŞ-dan alınan texnoloji və kəşfiyyat dəstəyinin davamlılığı ilə bağlı narahatlıqları gücləndirib.

Editor.az xəbər verir ki, Euronews-un oktyabrın 14-də yaydığı məlumata görə, Ukrayna hərbi dairələri SpaceX şirkətinin Starlink sisteminin hərbi istifadəsində yaranmış məhdudiyyətlərdən şikayət ediblər.

Bildirilir ki, bəzi terminalların sürət həddi ilə bağlı problemlər pilotsuz aparatların müəyyən missiyalarına mane olub.
Starlink Ukrayna ordusunun rabitə, məlumat ötürülməsi və cəbhə əməliyyatlarının əlaqələndirilməsi üçün mühüm vasitələrdən biridir. Buna görə də sistemin fəaliyyətindəki gözlənilməz dəyişikliklər hərbi logistika və əməliyyatların planlaşdırılması baxımından çətinliklər yarada bilər.
Eyni zamanda, Ukrayna prezidenti Volodimir Zelenski Rusiyanın raket zərbələrindən əvvəl tərəfdaş ölkələrdən lazımi xəbərdarlıqlar almadıqlarını bildirib.

Ukrayna tərəfinin məlumatına görə, Rusiyanın enerji infrastrukturuna hücumları nəticəsində yüz minlərlə insan elektrik enerjisiz qalıb. Avropa İttifaqı isə ABŞ-ın Ukrayna ilə kəşfiyyat məlumatlarını bölüşməyi dayandırdığına dair təsdiqlənmiş əlamət görmədiyini açıqlayıb.

//Samir Qurbanov, Editor.az