Yəməndə fəaliyyət göstərən husilər Səudiyyə Ərəbistanının şərqində yerləşən Dhəhran şəhərində dövlətə məxsus neft şirkəti Aramco-nun qərargahına raket zərbəsi endiriblər.

Editor.a xəbər verir ki, Associated Press-in regional rəsmilərə istinadən yaydığı məlumata görə, hücum nəticəsində binanın yuxarı üç mərtəbəsinə ziyan dəyib. Ölən və yaralananlar barədə məlumat verilməyib.

Husilər hücumu Səudiyyə Ərəbistanının Yəməndə onların nəzarətində olan ərazilərə, o cümlədən paytaxt Sənaya endirdiyi zərbələrə cavab kimi təqdim ediblər.
Səudiyyə Ərəbistanı Yəmənin beynəlxalq səviyyədə tanınan hökumətini dəstəkləyir. Husilər isə uzun müddətdir ölkədəki münaqişənin əsas iştirakçılarından biridir. Son hücumlar qarşıdurmanın Yəmən sərhədlərindən kənara çıxaraq Səudiyyə Ərəbistanının enerji infrastrukturu üçün də təhlükə yaratdığını göstərir.

Digər tərəfdən, husilərin siyasi nümayəndəsi Məhəmməd əl-Buxeyti Associated Press-ə açıqlamasında Oman, Rusiya və Çinin vasitəçilik səylərindən danışıb. Onun sözlərinə görə, hərəkat müharibənin və qarşılıqlı blokadanın sona çatmasına gətirib çıxaracaq danışıqlara hazırdır.

Bununla yanaşı, husilər Səudiyyə Ərəbistanının hava limanlarına və neft obyektlərinə qarşı yeni hücumlar həyata keçirə biləcəkləri barədə xəbərdarlıqlarını davam etdiriblər.

//Samir Qurbanov, Editor.az