İranın müdafiə nazirinin strateji planlaşdırma üzrə müavini Talaei-Nik Reza Bişkekdə ŞƏT üzv dövlətlərinin müdafiə nazirlərinin görüşündə çıxış edərək müstəqil dövlətlərlə hərbi əməkdaşlığa hazır olduğunu bildirib. 

Bu barədə “Tasnim” xəbər agentliyi məlumat yayıb. Onun sözlərinə görə, İran ABŞ-a qarşı praktik təcrübəsini ŞƏT üzvləri və digər xarici tərəfdaşlarla fəal şəkildə bölüşmək niyyətindədir. Müdafiə Nazirliyinin nümayəndəsi təşkilat daxilində strateji biliklərin birbaşa mübadiləsinin vacibliyini vurğulayıb. “Bu gün İran İslam Respublikası hərbi imkanlarını müstəqil ölkələrlə, xüsusən də ŞƏT üzvləri ilə bölüşməyə hazırdır.” – Talaei-Nik Reza deyib.

Qeyd edək ki, ABŞ-İsrail müharibəsi İrana qarşı 28 fevralda başlayıb. Hərbi kampaniya zamanı ABŞ və İsrail İslam Respublikasının ən böyük şəhərlərindəki hədəflərə zərbələr endirib. Buna cavab olaraq İİKK yəhudi ərazisinə və Yaxın Şərqdəki ABŞ hədəflərinə hücum edib. Təxminən üç həftə əvvəl ABŞ və İran 14 günlük atəşkəs barədə razılığa gəliblər. Donald Tramp daha sonra münaqişənin diplomatik həllinə nail olmaq üçün onu qeyri-müəyyən müddətə uzadıb.

//Samir Qurbanov, Editor.az