İsraildə keçirilən parlament seçkiləri ölkənin siyasi gələcəyi ilə bağlı qeyri-müəyyənliyi artırıb.

İlkin nəticələr Baş nazir Benyamin Netanyahunun rəhbərlik etdiyi sağçı blokun parlamentdə hökumət qurmaq üçün tələb olunan 61 mandatı əldə edə bilmədiyini göstərir.

Netanyahunun partiyası ən böyük siyasi qüvvə olaraq qalsa da, koalisiya yaratmaq üçün digər partiyaların dəstəyinə ehtiyac duyur. Müxalifət düşərgəsi də hökuməti formalaşdırmaq imkanlarını qiymətləndirir, lakin bunun üçün ərəb partiyaları ilə əməkdaşlıq məsələsi siyasi baxımdan həssas olaraq qalır.

Seçkilərdə əsas müzakirə mövzuları 2023-cü il oktyabrın 7-də baş vermiş hücumlarla bağlı təhlükəsizlik uğursuzluqları, Qəzza müharibəsi və ultraortodoks yəhudilərin hərbi xidmətə münasibəti olub.

Nəticələrin yekunlaşmasından sonra koalisiya danışıqlarının həftələrlə davam etməsi mümkündür. Siyasi qüvvələr arasında razılıq əldə olunmasa, ölkədə yeni seçkilər məsələsi yenidən gündəmə gələ bilər.

//Samir Qurbanov, Editor.az