Monakoda ukraynalı milyarder, oliqarx Vadim Yermolayevə qarşı törədilmiş səs-küylü partlayış işi yeni və müəmmalı mərhələyə keçib. Ukrayna mediasının yaydığı son məlumatlara görə, bu iş üzrə əsas şübhəli hesab edilən 39 yaşlı Anastasiya Berezovskanın meyiti Kiyev vilayətində aşkarlanıb. Bildirilir ki, qadın güllələnərək qətlə yetirilib, daha sonra isə meşəlik ərazidə basdırılıb. Hadisə ilə bağlı artıq iki nəfər saxlanılıb. Onlardan birinin Ukrayna Müdafiə Nazirliyinin Baş Kəşfiyyat İdarəsinin (GUR) fəaliyyətdə olan zabiti, digərinin isə keçmiş hüquq-mühafizə orqanı əməkdaşı olduğu bildirilir.

Musavat.com-a görə, bu məlumat Monakoda iyunun sonunda baş vermiş və bütün Avropada böyük rezonans doğurmuş partlayış işinin daha da mürəkkəb xarakter aldığını göstərir.

İstintaq materiallarına görə, partlayış Monakonun elit yaşayış məhəllələrindən birində, Vadim Yermolayevin yaşadığı binanın girişində baş verib. Binanın girişinə əvvəlcədən yerləşdirilmiş partlayıcı qurğu uzaqdan idarəetmə ilə işə salınıb. Hadisə nəticəsində Yermolayev ağır yaralanıb. Onunla birlikdə olan Anna Nasobina hər iki ayağını itirib, yanında olan 13 yaşlı uşaq da müxtəlif dərəcəli xəsarətlər alıb. Monako prokurorluğu hadisəni terror aktı deyil, əvvəlcədən planlaşdırılmış qəsdən adam öldürməyə cəhd kimi qiymətləndirir.

İlk günlərdə təhlükəsizlik kameralarındakı görüntülərdə şübhəlinin kişi olduğu ehtimal edilirdi. Sonradan aparılan araşdırmalar nəticəsində məlum olub ki, həmin şəxs kişi paltarında gizlənmiş qadın olub. İnterpol qısa müddət sonra Anastasiya Berezovska barəsində “qırmızı bülleten” elan edib. Məlumata görə, o, hadisədən sonra Fransa, Almaniya və digər Avropa ölkələri üzərindən hərəkət edib.

Vadim Yermolayev kimdir?

Vadim Yermolayev Ukrayna əsilli iri biznesmenlərdən biridir. O, son illərdə Kipr vətəndaşlığı alıb və əsasən Monakoda yaşayır. Ukrayna hakimiyyəti 2023-cü ildə onu Rusiyanın işğal etdiyi Krımda biznes fəaliyyətini davam etdirdiyi iddiası ilə sanksiya siyahısına salmışdı. Bununla belə, onun siyasi fəaliyyətlə məşğul olmadığı, daha çox iri tikinti və investisiya layihələri ilə tanındığı bildirilir.

Sui-qəsdin arxasında kim dayanır?

İndiyədək nə Monako, nə Fransa, nə də Ukrayna istintaq orqanları hadisənin sifarişçisinin kim olduğunu açıqlayıb. Bununla yanaşı, müxtəlif versiyalar müzakirə olunur.

Bir sıra media orqanları hücumun oliqarxın ailəsi və biznes əlaqələri ilə bağlı maliyyə mübahisələrinin nəticəsi ola biləcəyini yazır. Digər ehtimallara görə, hadisə transmilli cinayətkar qrupların fəaliyyəti və ya köhnə biznes hesablaşmaları ilə bağlı ola bilər. Bəzi nəşrlərdə Yermolayevin oğlunun vaxtilə böyük maliyyə fırıldaqları ilə bağlı cinayət işində adı keçdiyi də xatırladılır. Bununla belə, bu versiyaların heç biri rəsmi şəkildə təsdiqlənməyib.

Əsas şübhəlinin ölümü yeni suallar yaradıb

Anastasiya Berezovskanın öldürülməsi istintaqın istiqamətini tamamilə dəyişə bilər. Ukrayna mediası onun qətlə yetirilməsinin sifarişçilərin izləri ört-basdır etmək cəhdi ola biləcəyini istisna etmir. Lakin hüquq-mühafizə orqanları bu barədə hələlik rəsmi açıqlama verməyib.

İki nəfərin saxlanılması isə işin təkcə fərdi cinayət deyil, daha geniş təşkilatlanmış şəbəkə ilə bağlı ola biləcəyi ehtimalını gücləndirib. Hazırda istintaq Monako, Fransa, Almaniya və Ukrayna hüquq-mühafizə orqanlarının əməkdaşlığı ilə davam etdirilir.

Monakoda nadir hallarda baş verən bu cür partlayış və onun ardınca əsas şübhəlinin müəmmalı şəkildə öldürülməsi Avropanın son illərdə ən səs-küylü kriminal hadisələrindən biri kimi qiymətləndirilir. Hadisənin sifarişçiləri və motivi ilə bağlı yekun nəticələrin isə yalnız istintaq başa çatdıqdan sonra məlum olacağı bildirilir.

Musavat.com