İranın xarici işlər naziri Abbas Əraqçi Fransa Prezidenti Emmanuel Makronu İranla bağlı müharibədə ABŞ-yə dəstək verməkdə və baş verənlərə görə məsuliyyət daşımaqda ittiham edib.

Editor.az APA-ya istinadən xəbər verir ki, Əraqçi bu barədə “X” sosial şəbəkəsindəki hesabında paylaşım edib.

İranlı nazir Fransa liderinin mövqeyini sərt tənqid edərək bildirib ki, onun fikrincə, müharibəyə səbəb olan şəxsləri indi günahlandırmaq artıq gecdir.

Əraqçi iddia edib ki, Makron ABŞ Prezidenti ilə söhbətində iranlılara qarşı törədildiyini bildirdiyi zorakılıqları dəstəklədiyini nümayiş etdirib.

“Cənab Makron iranlılara qarşı törədilən vəhşilikləri alqışladığını ABŞ Prezidentinə bildirməklə öz seçimini etdi”, – deyə İranın xarici işlər naziri vurğulayıb.

Əraqçi Fransa daxilindəki ictimai-siyasi vəziyyətə də toxunub. O, ölkə vətəndaşlarının, o cümlədən toplaşmaq azadlığı ilə bağlı genişmiqyaslı dəyişikliklər tələb etdiyini qeyd edib.

İran XİN rəhbəri Fransa Prezidentinə müraciət edərək ölkəsinin gələcəyi ilə bağlı cəmiyyətdən gələn çağırışlara diqqət yetirməyə səsləyib.

Qeyd edək ki, Əraqçinin açıqlamaları onun şəxsi mövqeyini əks etdirir. Makronun ittihamlara cavabı barədə təqdim olunan məlumatda hər hansı açıqlama yer almayıb.