Kişi geyimində parlaq rənglərdən istifadə edərkən dəri tonunu, xarici görünüşün kontrastını və çalarların bir-biri ilə uyğunluğunu nəzərə almaq vacibdir.
Editor.az xəbər verir ki, bu barədə kişi geyimləri üzrə “Grandi Marki” multibrend butikinin baş direktoru Aleksandr Komarov və stilist İrina Leuşina danışıb.
Mütəxəssislərin sözlərinə görə, bordo, tünd yaşıl və oxra kimi təbii çalarlar əksər kişilərə uyğun gəlir. Bununla belə, rəng seçimi insanın fərdi xüsusiyyətlərindən, xüsusilə dəri tonundan, saç rəngindən və xarici görünüşündəki kontrastdan asılıdır.
Tünd saçlı və açıq dərili, xarici görünüşündə yüksək kontrast olan kişilərə daha dərin və doymuş rənglər yaraşır. Daha yumşaq kontrasta malik kişilərə isə həmin rənglərin açıq və solğun çalarlarına üstünlük vermək tövsiyə olunur.
Ekspertlər rənglərin isti və soyuq alt tonlarına da diqqət yetirməyi məsləhət görürlər. Məsələn, boz alt tonlu yaşıl soyuq rəng tipinə, sarı alt tonlu yaşıl isə isti rəng tipinə daha uyğun ola bilər.
Uyğun rəng seçməkdə çətinlik çəkən kişilər parlaq çalarlardan üz nahiyəsindən uzaqda istifadə edə bilərlər. Bu məqsədlə rəngli şalvar, ayaqqabı və ya corab seçmək mümkündür. Beləliklə, rəngin dəri tonuna təsiri minimuma endirilir və obrazda rəng balansı qorunur.
Stilistlər üzündə qızartı olan kişilərə bordo rəngli geyimləri üzə yaxın hissədə istifadə etməməyi tövsiyə edirlər. Bu çalar dəridəki qızartıları daha nəzərəçarpan edə bilər. Bordo rəngini şalvar və digər geyim elementlərində istifadə etmək, üz nahiyəsində isə dəri tonuna uyğun rənglərə üstünlük vermək daha məqsədəuyğundur.
Mütəxəssislərin fikrincə, kişilərin geyim seçimində yol verdiyi əsas səhvlərdən biri eyni obrazda həddindən artıq çox rəngdən istifadə etməkdir. Xüsusilə bir-biri ilə uyğunlaşmayan və fərqli alt tonlara malik üç-dörd rəngin birləşdirilməsi ümumi görünüşdə vizual qarışıqlıq yarada bilər.
İrina Leuşina rəng balansını qorumaq üçün 80/15/5 prinsipini tövsiyə edir. Bu yanaşmaya əsasən, geyimin 80 faizini əsas rənglər, 15 faizini onları tamamlayan çalarlar, 5 faizini isə diqqətçəkən rəng aksentləri təşkil etməlidir. Əsas rənglər neytral tonlardan seçilir, əlavə çalarlar isə ümumi palitranı tamamlayır.
Ekspertlər teksturaların həddindən artıq qarışdırılmasını da düzgün hesab etmirlər. Onların fikrincə, geyimdə ya tekstura, ya da rəng ön plana çıxmalıdır. Hər iki xüsusiyyəti özündə birləşdirən elementdən isə ölçülü şəkildə istifadə etmək lazımdır.
Digər geniş yayılmış səhv parlaq rəngin obrazın qalan hissəsi ilə əlaqələndirilməməsidir. Məsələn, yaşıl ayaqqabının geyimin digər elementləri və ya aksessuarlarla uyğunlaşdırılmaması ümumi görünüşdə ahəngsizlik yarada bilər.
Stilistlər bu cür hallarda eyni rəngi digər geyim elementlərində və ya aksessuarlarda təkrarlamağı tövsiyə edirlər. Onların qənaətinə görə, parlaq rənglərdən uğurla istifadə etməyin əsas şərtləri düzgün çalar seçimi, rəng balansının qorunması və geyim detallarının bir-biri ilə uyğunlaşdırılmasıdır.
//Gülnarə Abasova, Editor.az