Böyük Britaniya şahzadəsi Harri və həyat yoldaşı Meqan Markl avqust ayında ölkəyə gözlənilməz qayıdışlarından sonra ilk dəfə cümə axşamı birgə ictimai tədbirdə iştirak ediblər. Cütlük Nottingem şəhərində yerli sakinlərlə görüşüb, onlarla şəkil çəkdirib və hədiyyə edilən gülləri qəbul edib.
Editor.az Euronews-a istinadən xəbər verir ki, Kral III Çarlzın kiçik oğlu olan 42 yaşlı Harri və 45 yaşlı Meqan 2020-ci ildə kral ailəsində yaranan ciddi fikir ayrılıqlarından sonra Britaniyanı tərk etmiş, rəsmi kral vəzifələrindən imtina etmişdilər. Onlar Nottingemə gələrkən izdihamın alqışları ilə qarşılanıblar. Cütlük şəhər sakinləri ilə söhbət edib, zarafatlaşıb və onlarla səmimi ünsiyyət qurub.
Sussex hersoqu və hersoginyası kimi tanınan cütlüyün bu səfəri Bukingem sarayının mövqeyi ilə bağlı müzakirələri yenidən gündəmə gətirib. Belə ki, ötən ay yayımlanan məktubda kral ailəsi Harri və Meqanın statusunun adi vətəndaşların mövqeyinə uyğun olduğu bildirilib. Sənəddə onların kral ailəsinin fəaliyyət göstərən üzvləri kimi təqdim edilməməli olduqları da vurğulanıb.
Səfər çərçivəsində Harri və Meqanın Nottingemdə gənclərə və yerli icmalara dəstək göstərən üç xeyriyyə təşkilatını ziyarət etməsi nəzərdə tutulub. Bu qurumlar musiqi, kino və idman vasitəsilə gənclərin inkişafına, eləcə də ərzaq çatışmazlığı ilə mübarizəyə töhfə verir.
Harri və Meqan kral ailəsi ilə münasibətləri bərpa etməyə çalışırlar
Kral ailəsinin digər üzvləri ilə münasibətləri kəskin şəkildə pisləşdikdən sonra Harri və Meqan ABŞ-nin Kaliforniya ştatında məskunlaşıblar. Cütlüyün kral III Çarlzla münasibətlərində müəyyən yaxınlaşma olduğu bildirilsə də, Harrinin böyük qardaşı və taxtın varisi şahzadə Uilyamla münasibətləri hələ də soyuq olaraq qalır.
Onlar altı il əvvəl ABŞ-yə köçüblər. Avqust ayında isə iki övladları – yeddi yaşlı Arçi və beş yaşlı Lilibetlə birlikdə Böyük Britaniyaya qayıtmaq qərarı veriblər.
Harri və Meqanın kral ailəsindəki statusu müzakirə mövzusudur
Kraliça II Elizabet 2022-ci ildə vəfat etməzdən əvvəl Harri və Meqana kral ailəsində yarı rəsmi statusun mümkün olmadığını bildirmişdi. Bu mövqe onların eyni zamanda kommersiya fəaliyyəti ilə məşğul olmaqla yanaşı, kral ailəsinin rəsmi nümayəndələri kimi çıxış etmələrini istisna edirdi.
Kral sarayının ən yüksək vəzifəli rəsmisi olan Lord Çemberlenin ötən ay yaydığı məktubda cütlüyün ölkəyə qayıtmasından sonra onların statusu ilə bağlı bir sıra sorğuların daxil olduğu qeyd edilib.
Məktubda xatırladılıb ki, Harri və Meqan 2020-ci ilin yanvarında monarxın adından rəsmi nümayəndəlik vəzifələrini yerinə yetirməkdən imtina ediblər və artıq kral ailəsinin fəaliyyət göstərən üzvləri deyillər.
Sənəddə onların maliyyə müstəqilliyinə və şəxsi həyatlarının qorunmasına dair seçimlərinə hörmətlə yanaşılacağı da vurğulanıb.
Kral ailəsinin fəaliyyət göstərən üzvləri monarxın adından rəsmi tədbirlərdə iştirak edir və dövlət vəzifələrini yerinə yetirirlər. Bu fəaliyyətlər üçün onlara kral sarayı tərəfindən inzibati və digər dəstək göstərilir.
Hazırda bu statusa malik yeddi əsas şəxs var: kral III Çarlz və kraliça Kamilla, şahzadə Uilyam və həyat yoldaşı Ketrin, həmçinin kralın bacısı şahzadə Anna, qardaşı Edvard və Edvardın həyat yoldaşı Sofi. Mərhum kraliça II Elizabetin bəzi əmioğlu və xalaoğulları da kral ailəsinin rəsmi vəzifələrini yerinə yetirirlər.
\\ Aydan Bünyatova, Editor.az