ABŞ prezidenti Donald Trump-ın yaxın günlərdə Çin Xalq Respublikasına edəcəyi rəsmi səfərə dünyanın aparıcı texnologiya və maliyyə şirkətlərinin rəhbərləri də qoşulacaq.

Editor.az xəbər verir ki, səfərdə ən diqqətçəkən adlar arasında Elon Musk (Tesla və SpaceX rəhbəri) və Tim Cook (Apple şirkətinin baş icraçı direktoru) yer alır. Onlar ABŞ prezidentinin yüksək səviyyəli nümayəndə heyətinin tərkibində Pekinə yollanacaqlar.

Səfərin əsas məqsədinin ABŞ və Çin arasında ticarət, investisiya və texnologiya sahələrində əlaqələrin gücləndirilməsi olduğu bildirilir. Xüsusilə, tərəflər arasında yarımkeçiricilər, süni intellekt, aviasiya və enerji sektorları üzrə mümkün razılaşmaların müzakirə ediləcəyi gözlənilir.

Məlumatlara əsasən, nümayəndə heyətində həmçinin böyük maliyyə və sənaye şirkətlərinin rəhbərləri də yer alır. Onların səfərdə iştirakının ABŞ şirkətləri üçün Çin bazarında yeni müqavilələrin əldə olunmasına şərait yaratması hədəflənir.

Bununla yanaşı, bəzi mənbələr Nvidia rəhbəri Jensen Huang-ın səfər siyahısında yer almadığını bildirir.

Analitiklər hesab edirlər ki, bu səfər ABŞ–Çin münasibətlərində son illərin ən mühüm iqtisadi diplomatik addımlarından biri ola bilər və qlobal texnologiya bazarına ciddi təsir göstərə bilər.

//Gülnarə Abasova, Editor.az