İranın İslam İnqilabı Keşikçiləri Korpusu (SEPAH) Hörmüz boğazında Sinqapur bayrağı altında üzən yük gəmisinə hücum edib.

Bu barədə The Wall Street Journal ABŞ rəsmilərinə istinadən məlumat yayıb.

Nəşrin məlumatına görə, insident son günlər Hörmüz boğazında gəmiçiliyin təhlükəsizliyi ilə bağlı artan gərginlik fonunda baş verib. Mənbələrin iddiasına əsasən, hücum SEPAH qüvvələri tərəfindən həyata keçirilib.
Hadisə nəticəsində gəminin vəziyyəti və ekipaj üzvlərinin taleyi barədə ətraflı məlumat açıqlanmayıb. İran rəsmiləri isə hələlik bu iddialarla bağlı rəsmi açıqlama verməyiblər.

Ekspertlər bildirirlər ki, Hörmüz boğazında baş verən bu cür insidentlər qlobal enerji və yükdaşımalar bazarına ciddi təsir göstərə bilər. Dünyada dəniz yolu ilə daşınan neftin əhəmiyyətli hissəsi məhz bu strateji boğazdan keçir.

Qeyd edək ki, son həftələr İran ətrafında artan regional gərginlik səbəbindən Hörmüz boğazında təhlükəsizlik məsələləri beynəlxalq gündəmin əsas mövzularından birinə çevrilib. Bu səbəbdən bölgədə baş verən hər hansı insident dünya ölkələri tərəfindən diqqətlə izlənilir.

//Samir Qurbanov, Editor.az