Almaniya iqtisadiyyatını canlandırmaq və ölkəyə yeni investisiyalar cəlb etmək istəyərkən iri əczaçılıq şirkətinin qərarı ilə üzləşib. İsveçrənin əczaçılıq nəhəngi “Roche” Almaniyada gələcək investisiya planlarını müvəqqəti dayandırdığını açıqlayıb.

Şirkətin bu addımı Berlində hökumətin təşkilatçılığı ilə keçirilən investisiya sammiti ərəfəsində Almaniya üçün arzuolunmaz hadisə kimi qiymətləndirilir.

Editor.az Euronews-a istinadən xəbər verir ki, “Roche” şirkətinin Almaniya üzrə rəhbəri Daniel Steiners “Die Welt” qəzetinə açıqlamasında bildirib ki, hazırda ölkədə bütün gələcək investisiya qərarları dayandırılıb. O, son dövrlərdə qəbul edilən siyasi qərarların əczaçılıq sektorunda biznes mühitinə olan etimadı ciddi şəkildə sarsıtdığını vurğulayıb.

Almaniyada dərman şirkətlərinə yeni tələblər

Mübahisənin əsas səbəblərindən biri Almaniyada dərman qiymətlərinə dair qəbul edilən yeni qanunvericilik dəyişiklikləridir.

Almaniya parlamenti iyul ayında icbari tibbi sığorta sisteminin xərclərini nəzarətdə saxlamaq məqsədilə dərman istehsalçılarına qiymət güzəştlərini artırmaq öhdəliyi qoyan qanun qəbul edib.

Yeni qaydalara əsasən, əksər brend dərmanlar üzrə istehsalçıların tətbiq etməli olduğu güzəşt dərəcəsinin hazırkı 7 faizdən gələn ildən etibarən 15,5 faizə yüksəldilməsi nəzərdə tutulur.

Əczaçılıq şirkətləri bu tədbirlərin investisiya imkanlarına və sektorda biznes etimadına mənfi təsir göstərə biləcəyindən narahatdırlar.

ABŞ da iyun ayında Almaniyanın dərman qiymətləri siyasəti ilə bağlı araşdırmaya başlayıb. Vaşinqton Berlinin innovativ dərman məhsullarına davamlı olaraq aşağı ödəniş etməsini bu məsələdə əsas gətirib.

Almaniya hökuməti qərarı müdafiə edir

Almaniyanın iqtisadiyyat naziri Katherina Reiche məsələ ilə bağlı açıqlamasında hökumətin tədbirlərinin sosial sığorta haqlarını nəzarətdə saxlamaq üçün zəruri olduğunu bildirib.

Bununla yanaşı, nazir əczaçılıq sənayesinin ölkə iqtisadiyyatına verdiyi böyük töhfəni də xüsusi qeyd edib.

“Roche”un investisiyalarla bağlı qərarı hökumətin Almaniyaya biznes marağını artırmağa çalışdığı bir vaxta təsadüf edib. Berlində keçirilən investisiya sammitinin əsas məqsədlərindən biri Avropanın ən böyük iqtisadiyyatına investorların marağını gücləndirməkdir.

Almaniya iqtisadiyyatı bir neçə istiqamətdən təzyiq altındadır

Ölkə iqtisadiyyatı zəif daxili tələbat, ABŞ-ın gömrük rüsumları və Çin şirkətlərinin artan rəqabəti ilə üzləşir. Pandemiyadan sonra iqtisadi fəallığın bərpasına baxmayaraq, Almaniya 2022-ci ilin sonlarından etibarən davamlı və nəzərəçarpan iqtisadi artıma nail olmaqda çətinlik çəkir.

“Siemens” şirkətinin baş icraçı direktoru Roland Busch da “Roche”un qərarını Almaniya üçün xəbərdarlıq kimi qiymətləndirib. Onun sözlərinə görə, şirkətlər ölkədə investisiya şəraitini əlverişsiz hesab etdikdə vəsaitlərini başqa ölkələrə yönəldə bilərlər.

Bu hadisə Almaniyada dərman qiymətlərinin tənzimlənməsi, biznes mühitinin rəqabət qabiliyyəti və xarici investisiyaların gələcəyi ilə bağlı müzakirələri yenidən gündəmə gətirib.

\\ Aydan Bünyatova, Editor.az