İranın xarici işlər naziri Abbas Əraqçi Hörmüz boğazında təhlükəsizlik vəziyyətinin pisləşməsinə və regional gərginliyin artmasına görə ABŞ-ı məsul tutub. O, problemlərin diplomatik vasitələrlə həll edilməsinin vacibliyini vurğulayıb.

Editor.az xəbər verir ki, Reuters-in məlumatına görə, Əraqçi bu açıqlamanı Rusiyanın xarici işlər naziri Sergey Lavrovla birgə keçirdiyi mətbuat konfransında səsləndirib. İranlı nazir region ölkələrinin təhlükəsizlik məsələlərini öz aralarında müzakirə etməli və birgə təhlükəsizlik mexanizmi yaratmaq istiqamətində çalışmalı olduqlarını bildirib.

Əraqçinin fikrincə, regionda sabitliyin təmin olunması üçün xarici hərbi qüvvələrdən asılılığın azaldılması və yerli ölkələrin əməkdaşlığının gücləndirilməsi vacibdir. O, regional təhlükəsizliyin region dövlətlərinin öz təşəbbüsləri ilə təmin olunmasını dəstəklədiyini ifadə edib.

Hörmüz boğazı dünya enerji ticarətinin ən mühüm strateji marşrutlarından biridir. Fars körfəzini Oman körfəzi ilə birləşdirən bu su yolu vasitəsilə böyük həcmdə neft və digər enerji resursları beynəlxalq bazarlara daşınır.
Bu səbəbdən boğazda mümkün hərbi qarşıdurma və ya gəmiçilik məhdudiyyətləri yalnız region ölkələrinə deyil, dünya enerji bazarlarına və neft qiymətlərinə də təsir göstərə bilər.
Tehranın son açıqlaması İranla ABŞ arasında mövcud fikir ayrılıqlarının davam etdiyini göstərir. Bununla belə, İran rəhbərliyinin diplomatiyaya çağırışı regional gərginliyin danışıqlar yolu ilə azaldılmasına marağın mövcud olduğunu nümayiş etdirir.

//Samir Qurbanov, Editor.az