Bakıda ərinin qətlini sifariş verməkdə təqsirləndirilən Əzizə Seyidova və digər üç nəfərin apellyasiya şikayətinə baxılıb. Bakı Apellyasiya Məhkəməsi birinci instansiya məhkəməsinin çıxardığı hökmü qüvvədə saxlayıb.
Editor.az-ın Oxu.Az-a istinadənməlumatına görə, hakim Zəfər Əhmədovun sədrliyi ilə keçirilən məhkəmə iclasında apellyasiya şikayəti üzrə yekun qərar elan olunub. Qərara əsasən, Əzizə Seyidova, Mehdi Məmmədov, Elvin Əliyev və Bəxtiyar Fərzəliyev barəsində əvvəlki cəza hökmü dəyişdirilməyib.
Təqsirləndirilən şəxslərə neçə il həbs cəzası verilib?
Bakı Ağır Cinayətlər Məhkəməsinin hökmü ilə Mehdi Məmmədov 18 il 6 ay, Elvin Əliyev və Bəxtiyar Fərzəliyev 17 il 6 ay, Əzizə Seyidova isə 17 il müddətinə azadlıqdan məhrum ediliblər.
Maştağada baş verən qətlin təfərrüatları
Hadisə 2023-cü il martın 15-də Bakının Sabunçu rayonunun Maştağa qəsəbəsində baş verib. İş üzrə ittihama əsasən, həmin vaxt 23 yaşında olan Əzizə Seyidova həyat yoldaşı Əli Seyidlini cəzalandırmaq niyyəti ilə onun öldürülməsini planlaşdırıb.
İstintaq materiallarında göstərilib ki, Əzizə Seyidova bu məqsədlə tanışı Mehdi Məmmədova müraciət edib. İddia olunan plana əsasən, onlar Əli Seyidlinin evə gəlib-getdiyi vaxtları əvvəlcədən müəyyənləşdiriblər.
İttihama görə, 2023-cü il martın 15-də Seyidova Mehdi Məmmədovla əlaqə saxlayaraq qətlin həmin gün törədilməsini istəyib. Bundan sonra Məmmədov dostları ilə birlikdə gecə saatlarında Əli Seyidlinin yaşadığı evin yaxınlığında gözləyib.
Əli Seyidli evinə daxil olmaq istəyərkən onun qarşısı kəsilib və ona 23 bıçaq zərbəsi endirilib. Nəticədə o, həyatını itirib.
Məhkəmədə təqsirləndirilənlər nə deyiblər?
Məhkəmə prosesində Əzizə Seyidova ona qarşı irəli sürülən ittihamı qəbul etməyib. Digər təqsirləndirilənlər – Mehdi Məmmədov, Elvin Əliyev və Bəxtiyar Fərzəliyev isə özlərini qismən təqsirli biliblər.
Məhkəmə istintaqı zamanı təqsirləndirilən şəxslər ilkin istintaqda verdikləri ifadələri dəyişiblər. Onlar qətlin Əzizə Seyidovanın sifarişi ilə deyil, Əli Seyidli ilə aralarında olan şəxsi münasibətlər zəminində törədildiyini bildiriblər.
Bununla belə, Bakı Apellyasiya Məhkəməsi birinci instansiyanın hökmünü qüvvədə saxlayıb və təqsirləndirilən şəxslərin cəzaları dəyişdirilməyib.