Oktyabrın 20-də Bakı Olimpiya Stadionunda keçiriləcək UEFA Çempionlar Liqası qarşılaşması ilə əlaqədar Bakı metrosunda gücləndirilmiş iş rejiminə keçiləcək.

Editor.az-ın məlumatına görə, bu barədə “Bakı Metropoliteni” QSC-dən bildirilib.

Qarşılaşma zamanı azarkeşlərin rahat və təhlükəsiz daşınmasını təmin etmək məqsədilə stadionun yaxınlığında yerləşən “Koroğlu” metro stansiyasında əlavə tədbirlər görüləcək.

Belə ki, stansiyada işçi qüvvəsinin sayı artırılacaq, sərnişin axınına nəzarət gücləndiriləcək. Ehtiyac yaranacağı təqdirdə xəttə buraxılması üçün ehtiyat qatarlar da hazır vəziyyətdə saxlanılacaq.

Bununla yanaşı, metronun Yaşıl və Bənövşəyi xətləri üzrə qatarların hərəkət cədvəlində dəyişiklik nəzərdə tutulmayıb.

Beləliklə, futbol qarşılaşması ilə əlaqədar metroda sərnişin axınının idarə olunması üçün əlavə hazırlıq tədbirləri həyata keçiriləcək.