Azərbaycanda hərbi qulluqçuların rütbələrdə xidmət müddətinin hesablanması qaydalarına dəyişiklik edilməsi təklif olunur. Milli Məclis magistratura və ya rezidentura təhsilini, eləcə də doktoranturanı başa vuraraq elmi dərəcə əldə edən bəzi hərbçilər üçün “leytenant” rütbəsində olma müddətinin azaldılmasını nəzərdə tutan qanun layihəsini ilk oxunuşda qəbul edib.

Editor.az xəbər verir ki, məsələ parlamentin iclasında “Hərbi xidmətkeçmə haqqında” Əsasnamənin təsdiq edilməsi və “Hərbi vəzifə və hərbi xidmət haqqında” qanunlara dəyişikliklər layihəsi çərçivəsində müzakirə olunub.

Təhsil alan zabitlər üçün müddət 1 il azaldıla bilər

Təklifə əsasən, Azərbaycan Silahlı Qüvvələrinin və hərbi xidmət nəzərdə tutulan digər dövlət qurumlarının sifarişi ilə magistratura və ya rezidentura təhsilini bitirən, yaxud doktoranturada və adyunkturada oxuyaraq müvafiq elmi dərəcə alan zabitlərin rütbədə qalma müddətinin azaldılması nəzərdə tutulur.

Müddətin hər bir müvafiq təhsil səviyyəsi üzrə yalnız bir dəfə olmaqla 1 il azaldılması təklif edilir.

“Leytenant” rütbəsində xidmət müddəti necə müəyyənləşdiriləcək?

Qanun layihəsində “leytenant” rütbəsində olma müddətinə dair digər qaydaların da yenilənməsi nəzərdə tutulur.

Təklifə görə, təhsil müddəti beş il olan xüsusi təyinatlı hərbi təhsil müəssisələrini bitirmiş hərbi qulluqçular üçün bu müddət 2 il müəyyənləşdiriləcək.

Aviasiyanın uçuş heyətində və sualtı gəmilərdə xidmət edən hərbi qulluqçular üçün isə “leytenant” rütbəsində olma müddətinin 1 il olması təklif edilir. Müvafiq icra hakimiyyəti orqanının müəyyən etdiyi digər hallarda da birillik müddət tətbiq oluna bilər.

Dəyişikliklər hərbi rütbələrdə xidmət müddətinin təhsil səviyyəsi və xidmət xüsusiyyətləri nəzərə alınmaqla tənzimlənməsinə yönəlib.

Qeyd edək ki, qanun layihəsi Milli Məclisdə ilk oxunuşda qəbul edilib. Təkliflərin qüvvəyə minməsi üçün qanunvericilikdə nəzərdə tutulan sonrakı prosedurlar tamamlanmalıdır.