Moldova prezidenti Maya Sandu Rusiyanın Ukrayna ilə Moldova sərhədində yerləşən keçid məntəqəsinə zərbəsindən sonra təhlükəsizliklə bağlı ciddi xəbərdarlıq edib.

Sandunun sözlərinə görə, Rusiyanın müharibədə yaratdığı təhlükə artıq Ukraynanın sərhədlərindən kənara çıxmaq riski daşıyır. O, “Rusiyanın cəbhə xətti daha da qərbə doğru irəliləyir” fikrini səsləndirib.

Editor.az xəbər verir ki, Məlumata əsasən, Ukraynanın Moldova ilə sərhədində yerləşən Starokozache keçid məntəqəsinə gecə saatlarında zərbə endirilib. Hücum nəticəsində iki nəfər ölüb, bir neçə nəfər yaralanıb və sərhəd keçidi müvəqqəti bağlanıb.

Hadisədən bir gün əvvəl isə Moldova hava məkanına pilotsuz uçuş aparatının daxil olması ilə bağlı məlumat yayılmışdı. Bu hadisələr Kişinyovda Rusiyanın regiondakı hərbi fəaliyyətinin mümkün nəticələri ilə bağlı narahatlığı artırıb.

Maya Sandu ölkəsinin hava müşahidəsi və müdafiə imkanlarını Avropa tərəfdaşları ilə birlikdə gücləndirəcəyini bildirib. O, həmçinin Ukraynaya daha çox hava hücumundan müdafiə sisteminin verilməsinə çağırış edib.

Bu hadisələr Moldova üçün xüsusilə həssas məqamda baş verir. Kişinyov Ukrayna müharibəsinin öz ərazisinə və milli təhlükəsizliyinə təsirindən ehtiyat edir.

//Samir Qurbanov, Editor.az