ABŞ və İran arasında artan hərbi qarşıdurma dünya enerji bazarında ciddi narahatlıq yaradıb.

Brent markalı neftin qiyməti yenidən 100 dollar/barrel həddini keçib.

Editor.az  xəbər verir ki, Reuters-in məlumatına görə, Yaxın Şərqdə qarşıdurmanın genişlənməsi və Hörmüz boğazında gəmiçilik üçün təhlükənin artması enerji təchizatının gələcəyi ilə bağlı qorxuları gücləndirib. Brent neftinin qiyməti sentyabrın 9-da 101 dollardan yuxarı qalxıb.

Hörmüz boğazı dünya enerji bazarı üçün strateji əhəmiyyət daşıyır. Bu marşrutdan qlobal neft və qaz tədarükünün əhəmiyyətli hissəsi keçir. Bölgədə təhlükəsizliyin pisləşməsi nəticəsində bu marşrut üzrə daşımaların ciddi şəkildə azalması enerji qiymətlərinə birbaşa təsir göstərir.
Reuters bildirir ki, Yaxın Şərqdəki münaqişə artıq dünya bazarından gündəlik milyonlarla barel neft tədarükünü çıxarıb. Ehtiyatların azalması və əlavə istehsal imkanlarının məhdud olması bazarın yeni zərbələr qarşısında daha həssas vəziyyətə düşməsinə səbəb olur.

Neft qiymətlərinin yüksəlməsi yalnız enerji sektoruna deyil, həm də inflyasiyaya təsir göstərə bilər. Yanacağın bahalaşması nəqliyyat və istehsal xərclərini artıraraq Avropa və ABŞ-da qiymət təzyiqlərini gücləndirə bilər.
Beləliklə, ABŞ-İran qarşıdurmasının nəticələri artıq yalnız Yaxın Şərqlə məhdudlaşmır və qlobal iqtisadiyyat üçün ciddi riskə çevrilir.

//Samir Qurbanov, Editor.az