Ermənistanın Baş naziri Nikol Paşinyan Azərbaycanla davamlı sülhün təmin olunması üçün əsas götürülməli olan prinsipləri açıqlayıb. O, iki ölkə arasında ərazi məsələləri, kommunikasiyaların açılması və qarşılıqlı tələblərin aradan qaldırılması ilə bağlı fikirlərini bölüşüb.

Editor.az xəbər verir ki, Paşinyan bu barədə sosial şəbəkələrdə təşkil etdiyi canlı yayım zamanı danışıb.

Baş nazirin sözlərinə görə, sülh sazişi çərçivəsində Ermənistanın ərazisi 29 743 kvadratkilometr kimi müəyyənləşdirilməlidir. O, həmçinin sərhədin hər iki tərəfində anklav və eksklavların olmamasını, Azərbaycanla Ermənistan arasında ərazi mübadiləsinin həyata keçirilməsini mümkün prinsiplər sırasında qeyd edib.

Paşinyan kommunikasiyaların fəaliyyəti məsələsinə də toxunub. Onun fikrincə, “Sülh kəsişməsi” (“Crossroads of Peace”) layihəsi çərçivəsində və digər istiqamətlərdə bütün yolların və kommunikasiya xətlərinin açıq olması təmin edilməlidir.

Ermənistan hökumətinin başçısı iki ölkənin bir-birinə qarşı ərazi və digər məsələlərlə bağlı tələblər irəli sürməməsinin vacibliyini də vurğulayıb. O, Qarabağ, Girdman, Şirvan, Naxçıvan və Qərbi Azərbaycanla bağlı məsələləri nümunə göstərərək, bu cür iddiaların sülh gündəliyində yer almamalı olduğunu bildirib.

Paşinyan qeyd edib ki, Türkmənistanda Azərbaycan Prezidenti İlham Əliyevlə baş tutan son təmaslardan sonra iki ölkə arasında sülhün məhz bu prinsiplər əsasında mümkün ola biləcəyi qənaətinə gəlib.

Onun açıqlaması Azərbaycanla Ermənistan arasında münasibətlərin normallaşdırılması, sərhəd məsələləri və regional kommunikasiyaların gələcəyi ilə bağlı müzakirələri yenidən gündəmə gətirib.