Kreml mümkün çevriliş və ya sui-qəsd cəhdindən ehtiyat edərək Rusiya prezidenti Vladimir Putinin ətrafında təhlükəsizliyi gücləndirir.

CNN-in Avropa kəşfiyyatına istinadən verdiyi məlumata görə, bu narahatlıqlar fonunda Kreml onun ən yaxın adamlarının evlərində nəzarəti artırıb. Putinlə işləyən aşpazlar, mühafizəçilər və fotoqraflar da ictimai nəqliyyatdan istifadə etməkdən imtina ediblər. Putinlə görüşmək üçün hər kəs ikiqat təhlükəsizlik yoxlamasından keçməlidir. İnternetə çıxışı olan mobil telefonlar da qadağandır.

Kəşfiyyat məlumatlarına görə, bu tədbirlər son aylarda yüksək vəzifəli rus generalının öldürülməsindən sonra görülüb. Bu, həm ölkə daxilində, həm də beynəlxalq səviyyədə bir sıra çətinliklərlə üzləşən Kremldə narahatlıq yaradıb. Rusiya kəşfiyyat orqanları həmçinin Putinin müntəzəm olaraq ziyarət etdiyi yerlərin sayını kəskin şəkildə azaldıb. O və ailəsi Moskva və Valdaydakı yaşayış yerlərini ziyarət etməyi dayandırıblar. Putin 2025-ci ildə aktiv şəkildə ziyarət etməsinə baxmayaraq, bu il heç bir hərbi obyektə baş çəkməyib. Tammiqyaslı müharibənin başlanğıcından bəri Putin həftələrlə modernləşdirilmiş bunkerlərdə vaxt keçirir.

Bütün bunlara Rusiyanın Ukraynaya qarşı müharibəsi də təsir edib. Xüsusilə, Rusiyanın itkiləri ayda təxminən 30.000 təşkil edir, cəbhədəki irəliləyişi isə son dərəcə məhduddur. Kremlin tətbiq etdiyi və Putin tərəfdarı elitaya birbaşa təsir edən iqtisadi nəticələr və yeni məhdudiyyətlər də hiss olunmağa başlayır.

//Samir Qurbanov, Editor.az