Avtomobil bazarında retro dizaynlı elektrik modellərinə maraq artır. Fransanın “Citroën 2CV” modelinin elektrik versiyasının təqdim edilməsindən və retro üslublu “Fiat 500”ün populyarlığından sonra Çində istehsal olunan başqa bir avtomobil də diqqət mərkəzinə düşüb. “Volkswagen Beetle”ni xatırladan ORA Ballet Cat həm görünüşü, həm də qeyri-adi təchizatı ilə seçilir.
Editor.az Euronews-a istinadən xəbər verir ki, Çinin Great Wall Motor (GWM) şirkətinə məxsus ORA markasının hazırladığı bu elektrik avtomobili əsasən qadın müştərilər üçün nəzərdə tutulub. Modelin salonunda makiyaj güzgüsü, kosmetika üçün xüsusi bölmə və selfi kamerası kimi funksiyalar yer alır.
Makiyaj güzgüsü və xüsusi komfort rejimi
2022-ci ildə Çin bazarına çıxarılan ORA Ballet Cat istehsalçının qadın sürücülərə yönəlmiş modeli kimi təqdim edilib. Avtomobilin ən çox müzakirə olunan xüsusiyyətlərindən biri “Warm Man” adlı komfort rejimidir.
İstehsalçının məlumatına görə, bu funksiya bir düymə ilə oturacaq qızdırıcısını və iqlim nəzarətini aktivləşdirir. Sistem menstrual dövrdə yaranan narahatlığı azaltmağa kömək etmək məqsədi daşıyır.
Modeldə “Lady Driving Mode” adlı xüsusi sürüş rejimi də mövcuddur. Bu rejimə adaptiv kruiz-kontrol və parklanma köməkçiləri kimi sürücüyə dəstək və rahatlıq funksiyaları daxildir.
Avtomobilin yumru kuzovu, iri faraları və əyri qanadları klassik “Volkswagen Beetle” modelini xatırladır.
Elektrik mühərrikinin gücü artırılacaq
ORA Ballet Cat modelinin texniki cəhətdən yenilənməsi planlaşdırılır. Mövcud məlumatlara əsasən, elektrik mühərrikinin gücü 126 kilovatdan 150 kilovata yüksəldiləcək. Bu, təxminən 171 at qüvvəsindən 204 at qüvvəsinə keçid deməkdir.
Avtomobilin maksimal sürətinin də saatda 155 kilometrdən 180 kilometrə çatdırılması nəzərdə tutulur. Yenilənmiş versiyanın xarici görünüşündə isə ciddi dəyişiklik gözlənilmir.
Modeldə SVOLT şirkətinin litium-dəmir-fosfat batareyalarının saxlanılacağı bildirilir. Bununla belə, yenilənmiş avtomobilin batareya tutumu və bir enerji doldurulması ilə qət edəcəyi məsafə barədə hələlik ətraflı məlumat açıqlanmayıb.
CarNewsChina nəşrinin məlumatına görə, avtomobil gələcəkdə ORA 6 adı ilə də satışa çıxarıla bilər. Lakin ad dəyişikliyi rəsmi şəkildə təsdiqlənməyib.
ORA Ballet Cat neçəyə satılır?
Mövcud məlumatlara əsasən, avtomobilin Çindəki qiyməti versiyadan asılı olaraq təxminən 24 900-28 800 avro (49 800–57 600 azn) təşkil edir.
49,93 kilovat-saatlıq batareyaya malik versiyanın qiyməti 193 300 yuan (45 600 azn), 60,5 kilovat-saatlıq batareyalı variantın qiyməti isə 223 000 yuan (52 600 azn) göstərilir.
Qeyri-adi dizaynına və təchizatına baxmayaraq, modelin satış nəticələri məhdud olub. CarNewsChina nəşrinin məlumatına əsasən, 2022-ci ilin iyulundan 2026-cı ilin iyununa qədər Çində 8 523 ədəd ORA Ballet Cat təhvil verilib.
“Qadınlar üçün avtomobil” yanaşması müzakirə yaradır
ORA Ballet Cat qadın sürücülərin ehtiyaclarına uyğun təchizat ideyası ilə təqdim edilsə də, bu yanaşma birmənalı qarşılanmayıb.
Tənqidçilər hesab edirlər ki, bəzi funksiyaların sırf qadınlara aid edilməsi gender stereotiplərini gücləndirə bilər. Xüsusilə “Lady Driving Mode” ifadəsinin qadınların sükan arxasında daha çox yardıma ehtiyac duyduğu təəssüratı yaratdığı bildirilir.
Menstrual narahatlığı azaltmağa yönələn rejim də müzakirələrə səbəb olub. Bununla belə, avtomobilin rahatlığı və təhlükəsizliyi yalnız cinsə görə deyil, sürücünün fərdi ehtiyacları, oturuş mövqeyi və istifadə vərdişləri nəzərə alınmaqla qiymətləndirilməlidir.
“Punk Cat” modeli də “Beetle”ni xatırladır
ORA markası retro üslubda hazırlanan başqa bir elektrik avtomobili – Punk Cat modelini də təqdim edib. Bu avtomobil də yumru kuzovu və fərqli faraları ilə klassik “Volkswagen Beetle”yə bənzəyir.
Punk Cat 2021-ci ildə Şanxay avtosalonunda nümayiş etdirilib və Volkswagen modelinə vizual oxşarlığına görə müzakirələrə səbəb olub. Lakin Ballet Cat-dan fərqli olaraq, bu avtomobil əsasən qadınlar üçün nəzərdə tutulmuş model kimi təqdim edilməyib.
Punk Cat adı ilə seriyalı istehsal versiyası isə bazara çıxarılmayıb.
\\ Aydan Bünyatova, Editor.az