Qərbi Avropada müşahidə olunan güclü isti hava dalğası bölgədə yeni temperatur rekordlarının qeydə alınmasına səbəb olub. Alimlər bildirirlər ki, son göstəricilər iqlim dəyişikliyinin təsirlərinin daha da gücləndiyini nümayiş etdirir.  

Editor.az xəbər verir ki, məlumata görə, bir sıra ölkələrdə havanın temperaturu uzun illərin rekordunu yeniləyib. Yüksək temperatur səbəbindən səhiyyə xidmətləri gücləndirilib, bəzi bölgələrdə isə meşə yanğınları riskinin artdığı barədə xəbərdarlıq edilib.  

Mütəxəssislər hesab edirlər ki, fosil yanacaqlardan qaynaqlanan qlobal istiləşmə bu cür ekstremal hava hadisələrinin daha tez-tez və daha intensiv baş verməsinə şərait yaradır. Onların fikrincə, hazırkı isti hava dalğası bir neçə onillik əvvəl demək olar ki, mümkün hesab olunmurdu.  

İqlim üzrə ekspertlər hökumətləri istilik dalğalarına qarşı adaptasiya tədbirlərini gücləndirməyə, erkən xəbərdarlıq sistemlərini təkmilləşdirməyə və istixana qazı emissiyalarının azaldılması istiqamətində daha qəti addımlar atmağa çağırırlar.

//Gülnarə Abasova, Editor.az