“Real Madrid” və “Sevilya” arasında keçirilən qarşılaşmada hakim qərarları müzakirələrə səbəb olub. “Sevilya”nın baş məşqçisi Luiz Qarsiya Plaza oyunun idarəçiliyindən narazılığını ifadə edərək hakimləri Madrid təmsilçisinin lehinə qərarlar verməkdə ittiham edib.

Editor.az xəbər verir ki, mübahisənin əsas mövzusu “Real Madrid”in türkiyəli futbolçusu Arda Gülərin iştirakı ilə baş verən epizod olub.

Luiz Qarsiya Plazanın fikrincə, Arda Gülər rəqib futbolçuya dirsəklə zərbə endirdiyinə görə qırmızı vərəqə alaraq meydandan kənarlaşdırılmalı idi. Baş məşqçi bu epizodla bağlı hakim qərarını mübahisəli hesab edib.

Diqqətçəkən məqam isə odur ki, mübahisəli hadisədən cəmi bir neçə dəqiqə sonra Arda Gülər “Real Madrid”in ilk qolunu vurub. Türkiyəli futbolçu qarşılaşmanın 30-cu dəqiqəsində fərqlənib.

Beləliklə, həm hakim qərarı ətrafında yaranan mübahisə, həm də Arda Gülərin vurduğu qol qarşılaşmanın diqqətçəkən məqamları sırasında yer alıb.