Kreml Ukraynadakı münaqişənin yalnız müvəqqəti dayandırılmasının və ya dondurulmasının problemin köklü həllinə gətirib çıxarmayacağını açıqlayıb.

Editor.az AZXEBER.COM-a istinadən xəbər verir ki, Kremlin sözçüsü Dmitri Peskov Moskvada jurnalistlərin suallarını cavablandırarkən Rusiyanın Ukrayna münaqişəsinin həlli ilə bağlı mövqeyini açıqlayıb.

Peskovun sözlərinə görə, Moskva yalnız ayrı-ayrı məsələlər üzrə əldə ediləcək razılaşmaları kifayət hesab etmir. O bildirib ki, döyüşlərin müvəqqəti dayandırılması və ya münaqişənin dondurulması da yekun həll anlamına gəlmir.

Kremlin sözçüsü Ukrayna ilə bağlı hərtərəfli və uzunmüddətli razılaşmanın əldə olunmasının vacibliyini vurğulayıb. Onun fikrincə, ayrı-ayrı razılaşmalar münaqişənin tam şəkildə aradan qaldırılmasını təmin edə bilməz.

Peskov mümkün razılaşmanın yalnız hazırkı vəziyyət üçün deyil, həm də gələcək nəsillər üçün uzunmüddətli təminatlar yaratmalı olduğunu qeyd edib.

Kremlin sözçüsü həmçinin digər ölkələrin Ukrayna böhranının həlli istiqamətində irəli sürdüyü təşəbbüslərin Rusiya tərəfindən müsbət qarşılandığını bildirib. Bununla belə, Peskov hazırda həmin istiqamətdə konkret nəticə verə biləcək təşəbbüslərin ortaya çıxmadığını deyib.