Payız aylarında havanın dəyişməsi və qidalanma vərdişlərindəki kəskin dəyişikliklər mədə-bağırsaq sisteminin fəaliyyətinə mənfi təsir göstərə bilər.

Editor.az xəbər verir ki, həkim-terapevt və dietoloq Tatyana Zalетova bildirir ki, soyuq mövsümə keçid zamanı qida rasionunu birdən-birə dəyişmək məsləhət deyil. Onun sözlərinə görə, xüsusilə tərəvəz və meyvələrin qəbulu tədricən artırılmalıdır.

Mütəxəssis tərəvəz və meyvələri ilk mərhələdə bişmiş halda — məsələn, sobada, buğda və ya qaynadılmış şəkildə qəbul etməyi tövsiyə edir. Termiki emaldan keçmiş məhsullar, bir qayda olaraq, mədə və bağırsaq tərəfindən daha asan həzm olunur. Çiy tərəvəz və meyvələr isə rasiona tədricən əlavə edilməli və yaxşı çeynənilməlidir.

Dietoloq həmçinin isti yemək və içkilərə üstünlük verməyin vacibliyini vurğulayıb. Soyuq qida və hətta su bəzi insanlarda damar spazmını gücləndirərək, xüsusilə mədə-bağırsaq sistemi ilə bağlı problemi olan şəxslərdə narahatlıq yarada bilər.

Qidalanma rejiminə də diqqət yetirmək tövsiyə olunur. Yeməklərin təxminən eyni saatlarda qəbul edilməsi və əsas qida qəbulunun ötürülməməsi həzm sistemi üçün daha əlverişli hesab edilir.

Soyuq havalarda daha çox istifadə edilən acı və ədviyyatlı qidalarla bağlı da ehtiyatlı olmaq lazımdır. Belə məhsullar mədə turşusunun ifrazını artıra və həssas insanlarda narahatlıq yarada bilər.

Mütəxəssis “isidici” hesab edilən bəzi yeməklərin də hər zaman faydalı olmadığını qeyd edib. Yağlı şorbalar, çoxlu yağla hazırlanmış ət yeməkləri və qatı bulyonların həzmi daha çətin ola bilər və həssas mədə-bağırsaq selikli qişasına əlavə yük yarada bilər.

Bunun əvəzinə az yağlı bulyonda hazırlanmış şorbalar, buğda bişirilmiş, qaynadılmış və ya sobada hazırlanmış ət məhsulları, eləcə də balıq tövsiyə olunur.

Beləliklə, payız aylarında mədə-bağırsaq sisteminin sağlamlığını qorumaq üçün qidalanma rejimini tədricən dəyişmək, isti və asan həzm olunan qidalara üstünlük vermək, həmçinin ağır və həddindən artıq yağlı yeməklərdən uzaq durmaq məsləhət görülür.

//Gülnarə Abasova, Editor.az