Kofeinsiz qəhvə yaddaş üçün adi qəhvədən daha faydalı ola bilər. Yeni araşdırmanın nəticələri bu içkinin yaddaşın bəzi göstəricilərinə müsbət təsir göstərə biləcəyini ortaya qoyub.

Editor.az xəbər verir ki, araşdırma zamanı alimlər kofeinsiz qəhvənin insan beyninə təsirini araşdırıblar. Tədqiqatda 31 nəfər iştirak edib. İştirakçılar əvvəlcə iki həftə ərzində qəhvə qəbul etməyib, daha sonra üç həftə müddətində adi və ya kofeinsiz qəhvə içiblər.

Nəticələr göstərib ki, yaddaşın müəyyən göstəricilərində yaxşılaşma məhz kofeinsiz qəhvə qəbul edən iştirakçılarda müşahidə olunub. Adi qəhvə içənlərdə isə eyni nəticə qeydə alınmayıb.

Mütəxəssislər hesab edirlər ki, qəhvənin yaddaşa təsiri yalnız kofeinlə əlaqəli olmaya bilər. Qəhvə dənələrinin tərkibində antioksidantlar və digər bioloji aktiv maddələr də var. Bu maddələrin beyin fəaliyyətinə mümkün təsiri araşdırmanın nəticələrini izah edən amillərdən biri kimi nəzərdən keçirilir.

Bununla belə, mütəxəssislər nəticələrin ehtiyatla qiymətləndirilməsinin vacibliyini bildirirlər. Araşdırmada cəmi 31 nəfərin iştirak etməsi kofeinsiz qəhvənin yaddaşı yaxşılaşdırdığı barədə qəti nəticə çıxarmağa imkan vermir. Daha geniş iştirakçı qrupları ilə aparılacaq əlavə tədqiqatlara ehtiyac var.

Mütəxəssislərin fikrincə, qəhvənin orqanizmə təsiri qəbul edilən miqdardan və insanın fərdi xüsusiyyətlərindən də asılıdır. Bu səbəbdən yeni nəticələr kofeinsiz qəhvənin yaddaş üçün mütləq faydalı olduğu anlamına gəlmir. Araşdırmanın nəticələri yalnız gələcək elmi çalışmalar üçün maraqlı istiqamət yaradır.

//Gülnarə Abasova, Editor.az