ABŞ-da ölümcül iynə ilə edam cəhdindən sağ çıxan məhbus qadın hazırda şüurludur və danışa bilir. Onun vəkilləri hadisənin necə baş verdiyini araşdırmaq üçün məhkəməyə müraciət ediblər.
Editor.az Euronews-a istinadən xəbər verir ki, 50 yaşlı Krista Payk sentyabrın 30-da Tennessi ştatındakı həbsxanada ona ölümcül iynə vasitəsilə iki doza pentobarbital vurulmasından sonra sağ qalıb. Onun ölümcül inyeksiya dərmanlarının tətbiqindən sonra sağ qalan yeganə şəxs olduğu bildirilir.
Paykın vəkilləri çərşənbə axşamı açıqlamalarında bildiriblər ki, bütün ehtimallara baxmayaraq, onların müvəkkili hazırda şüurludur, danışır və həyati tibbi yardım almağa davam edir.
Vəkillərin sözlərinə görə, məhbus qadının qolları ciddi şəkildə zədələnib. Buna baxmayaraq, o, hələ də xəstəxana çarpayısına əl qandalları və zəncirlə bağlanmış vəziyyətdə saxlanılır.
Onlar əlavə ediblər ki, Paykın gələcək vəziyyəti hələ tam məlum deyil və onun uzunmüddətli müalicəyə ehtiyac duyacağı gözlənilir.
Krista Payk 1995-ci ildə 19 yaşlı Kollen Slemmerin öldürülməsinə görə ölüm cəzasına məhkum edilib. Cinayət törədilərkən Paykın 18 yaşı olub. Onun edamı baş tutsaydı, Tennessi ştatında 200 ildən çox müddətdə edam edilən ilk qadın olacaqdı.
Paykın vəkilləri çərşənbə günü Neşvildə məhkəmə qarşısına çıxaraq həbsxana sisteminin hadisə ilə bağlı sübutları qoruyub saxlamasını tələb edəcəklər. Bunlara istifadə edilən dərmanların partiya nömrələri, iynələr və edam proseduruna dair qeydlər daxildir.
Tennessi Baş Prokurorluğu isə belə bir qərarın zəruri olmadığını bildirib. Qurumun açıqlamasına görə, həbsxana sistemi digər işlərdə olduğu kimi bu sübutları saxlamağa və onların qorunmasını təmin etməyə borcludur.
Mütəxəssislər hadisənin venadaxili sistemdə yaranan problemlə bağlı ola biləcəyini ehtimal edirlər. İddialara görə, dərman damar vasitəsilə qan dövranına daxil olmaq əvəzinə toxumalarda toplanmış ola bilər.
Məhkəməyə təqdim edilən sənəddə Paykın xəstəxanaya çatdırıldığı zaman hər iki qolunun şişmiş, yanmış və qabarcıqlarla örtülmüş olduğu qeyd edilib.
Tennessi qubernatoru Bill Li hadisəni “dərin narahatlıq doğuran” hal kimi qiymətləndirib və hərtərəfli, müstəqil araşdırma aparılması barədə göstəriş verib.
Ştatda araşdırma yekunlaşana qədər bütün edamlar dayandırılıb. Bundan başqa, Tennessi həbsxana sisteminin rəhbəri vəzifəsindən istefa verib.
Krista Paykın vəkilləri yenidən qubernator Bill Lidən onun ölüm hökmünün ömürlük həbs cəzası ilə əvəzlənməsini istəyiblər. Bu cəza şərti azadlığa buraxılma imkanını nəzərdə tutmur.
\\ Aydan Bünyatova, Editor.az