Ermənistanın Baş naziri Nikol Paşinyan ölkəsində keçirdiyi növbəti təşviqat mitinqində həm erməni cəmiyyətində, həm də beynəlxalq mətbuatda bomba effekti yaradacaq, onilliklərdir davam edən erməni mifini darmadağın edən sensasiyalı bəyanatlarla çıxış edib.

Musavat.com xəbər verir ki, impiromizə olunmuş səhnə kimi istifadə edilən təşviqat pikapının qarşısında toplaşan kütləyə, xüsusilə ön sıralarda dayanan uşaqlara müraciət edən Paşinyan, vaxtilə dediyi irqçi şüarlardan necə imtina etdiyini və necə “hidayətə qovuşduğunu” açıqlayıb.

Paşinyan erməni xalqının gözünü açmağa çalışaraq deyib: “Bəli, mən o adamam ki, vaxtilə “Artsax Ermənistandır və nöqtə” demişdim. Bu onun ucbatından idi ki, mən düz 30 il boyunca bizi qidalandırdıqları, beynimizi yuduqları o saxta ideyaya sadiq idim. Lakin mən bu yolla getdim və həqiqəti öz gözlərimlə gördüm. Tam səmimiyyətlə dedim ki, bizim bu münaqişəni, bu qanayan yaranı gələcək nəsillərə ötürməyə haqqımız yoxdur. Biz uşaqlarımıza sülh ötürməliyik.

Mən bu problemin arxasınca bütün mümkün yollarla getdim və anladım ki, bu ideya sadəcə bir nəfs, qorxulu bir tələ imiş. Bəli, mən cəsarət nümayiş etdirərək xalqa düzgün yolla getmədiyimizi, “Qarabağ hərəkatı”nı dərhal dayandırmalı olduğumuzu söylədim. Məhz bunun sayəsində biz indi hər zamankından daha çox dövlətik, hər zamankından daha müstəqilik, təhlükəsizliyimiz və rifahımız hər zamankından daha yüksək səviyyədə təmin olunub”.

Ölkədə artıq tam sülhün bərqərar olduğunu iddia edən Baş nazir Ermənistan sərhədlərində artıq iki ildir ki, heç bir itkinin və yaralının olmadığını xüsusi vurğulayıb. Paşinyanın fikrincə, uydurma “Qarabağ hərəkatı”nın davam etdirilməsi yalnız yeni qanlı müharibələrə, minlərlə qurbana və nəticədə Ermənistan dövlətçiliyinin tamamilə yer üzündən silinməsinə səbəb olacaqdı. “Biz Ermənistan Respublikasını azad etdik, şəxsən mən Ermənistanı bu fəlakətdən xilas etdim. Mən bunu Ermənistan dövlətinə göstərdiyim ən böyük və tarixi xidmətim hesab edirəm” – deyə Paşinyan öz çıxışını yekunlaşdırıb.