Hollivudun tanınmış aktyoru Al Paçino uzun illər ərzində kino sənətinə verdiyi töhfələrə və xeyriyyə fəaliyyətinə görə nüfuzlu mükafata layiq görüləcək. ABŞ aktyorlar həmkarlar ittifaqı SAG-AFTRA aktyora ömürboyu nailiyyətlər mükafatının təqdim ediləcəyini açıqlayıb.
Editor.az-ın NBC News-a istinadən aldığı məlumata görə, “Xaç atası” filmində Maykl Korleone obrazı ilə dünya şöhrəti qazanan Al Paçino SAG-AFTRA-nın bu mükafatını alacaq 62-ci şəxs olacaq.
Mükafatlandırma mərasimi 2027-ci il fevralın 28-də Los-Ancelesdə keçiriləcək 33-cü Actor Awards tədbiri çərçivəsində baş tutacaq. Mərasimin Netflix platformasında canlı yayımlanması planlaşdırılır.
Altı onillikdən artıqdır kino, televiziya və teatr sahəsində fəaliyyət göstərən 86 yaşlı aktyor çoxsaylı yaddaqalan obrazları ilə tanınır. Onun məşhur rolları arasında 1973-cü ildə çəkilmiş “Serpiko” filmində polis əməkdaşı Frenk Serpiko, 1983-cü il istehsalı olan “Çapıq üz” filmində Toni Montana və Kventin Tarantinonun 2019-cu ildə ekranlaşdırdığı “Bir zamanlar… Hollivudda” filmində Marvin Şvarts obrazları yer alır.
SAG-AFTRA tərəfindən hər il təqdim olunan mükafat aktyorluq sənətinin ən yüksək dəyərlərini təcəssüm etdirən sənətkarlara verilir.
Al Paçino mükafata layiq görülməsinə münasibət bildirərək, həyatının böyük hissəsini axtarışlarda keçirsə də, ssenari və həmkarları ilə işləyərkən özünü doğma mühitdə hiss etdiyini deyib. Aktyor sənət yolunda qazandığı təcrübəni və digər aktyorlarla birgə çalışmasını həyatının ən böyük sevinclərindən biri kimi qiymətləndirib.
Paçino 1992-ci ildə ekranlara çıxan “Qadın ətri” filmindəki polkovnik-leytenant Frenk Sleyd roluna görə “Ən yaxşı aktyor” nominasiyasında “Oskar” mükafatını qazanıb. O, bununla yanaşı, “Emmi”, “Toni” və “Qızıl qlobus” mükafatlarına da layiq görülüb.
SAG-AFTRA-nın prezidenti Şon Astin də aktyorun yaradıcılığını yüksək qiymətləndirib. O bildirib ki, Paçinonun ifasını izləmək həm sənətə dərindən yiyələnmiş ustadın, həm də daim öyrənməyə davam edən sənətkarın fəaliyyətini görmək deməkdir.
Aktyorun fəaliyyəti yalnız kino ilə məhdudlaşmayıb. O, 2001-ci il sentyabrın 11-də ABŞ-də baş verən terror hücumlarından sonra təşkil olunan “America: A Tribute to Heroes” telemarafonunda iştirak edib. 2009-cu ildə isə xeyriyyə işlərinə verdiyi töhfələrə görə Artrit Fondunun Ceyn Uayman adına Humanitar mükafatını alıb.
1930-cu ildə deyil, 1940-cı ildə Nyu-Yorkda Alfredo Ceyms Paçino adı ilə dünyaya gələn aktyor 1960-cı illərdə davamlı iş tapmaqda çətinlik çəkib. Onun karyerasında dönüş nöqtəsi 1972-ci ildə çəkilən “Xaç atası” filmi olub.
Qeyd edək ki, SAG-AFTRA ABŞ-də kino və televiziya aktyorları ilə yanaşı, jurnalistləri, musiqiçiləri, aparıcıları, dublyaj sənətçilərini və digər media nümayəndələrini birləşdirən, təxminən 160 min üzvü olan həmkarlar ittifaqıdır.
\\ Aydan Bünyatova, Editor.az