Rumıniyanın Qara dəniz sahilləri yaxınlığında iki kimyəvi maddə daşıyan tankerə dronlarla hücum edildikdən sonra yeddi dənizçi itkin düşüb.

Gəmilərdə yanğın baş verib və xilasetmə əməliyyatlarına başlanılıb. Hadisə Ukraynanın taxıl ixracı üçün istifadə etdiyi dəniz və çay marşrutlarının təhlükəsizliyi ilə bağlı narahatlıqları artırıb.

Rumıniya Prezidenti Nikuşor Dan gəmilərin dron hücumuna məruz qaldığını təsdiqləsə də, hücumların kim tərəfindən həyata keçirildiyini birbaşa açıqlamayıb. NATO-nun hərbi mənbəsi isə hücumlarda istifadə olunan dronların Rusiya mənşəli olduğunu bildirib.

Gəmilərdən biri San-Marino bayrağı altında üzən Wine Trader tankeri olub. Gəmidəki 12 nəfərlik heyətdən beş nəfər xilas edilib, digərlərinin axtarışı isə əlverişsiz hava şəraitinə görə çətinləşib. Digər tanker — Yara J — Rumıniyanın ərazi sularında vurulub, onun heyətinin təhlükəsiz olduğu bildirilib.

NATO-nun baş katibi Mark Rütte Rumıniya və Bolqarıstan rəhbərliyi ilə görüşərək Qara dənizdə müdafiə və çəkindirmə tədbirlərinin gücləndirilməsi məsələsini müzakirə edib.
Qara dəniz Ukraynanın kənd təsərrüfatı məhsullarının beynəlxalq bazarlara çatdırılmasında mühüm rol oynayır. Limanlara və mülki gəmilərə qarşı hücumlar ixrac xərclərini artıra və ərzaq tədarükündə problemlər yarada bilər.

//Samir Qurbanov, Editor.az