Bakıda oktyabrın 19-dan bir neçə avtobus marşrutunun dayanacaq məntəqələri və hərəkət sxemlərində dəyişiklik ediləcək. Yeniliklər əsasən “20 Yanvar” metrostansiyası və “Şamaxinka” adlanan ərazini əhatə edəcək.
Editor.az-ın AYNA-ya istinadən verdiyi məlumata görə, dəyişikliklərin məqsədi sərnişin axınını daha səmərəli idarə etmək, avtobusların hərəkət intervalını tənzimləmək və sərnişinlərin rahat minib-düşməsini təmin etməkdir.
Hansı marşrutların dayanacağı dəyişir?
Oktyabrın 19-dan 114A, 114B, 500, 503 və 508 nömrəli avtobuslar Sumqayıt istiqamətində “20 Yanvar” metrostansiyasının yaxınlığında, Moskva prospektində yerləşən “14 saylı notariat ofisi”nin yanındakı dayanacaqdan istifadə etməyəcək.
114A və 114B nömrəli marşrutlarla gedən sərnişinlər avtobuslara metronun Müzəffər Həsənov küçəsindəki çıxışında, ADSEA binasının qarşısındakı dayanacaqdan minə bilərlər. Bu marşrutların növbəti dayanacağı “Şamaxinka”da, “Alov zavodu”nun qarşısında olacaq.
500, 503 və 508 nömrəli marşrutlardan istifadə edənlər isə metronun Sumqayıt istiqamətindəki çıxışında, Moskva prospekti 6 ünvanında yerləşən dayanacağa yönəlməlidirlər. Həmin avtobusların Sumqayıt istiqamətində növbəti dayanacağı da “Şamaxinka”da, “Alov zavodu”nun qarşısında yerləşəcək.
Hökməli və Binəqədi istiqamətində də dəyişiklik var
156, 156A və 170 nömrəli marşrutların hərəkət sxemi də yenilənəcək. Bu avtobuslar Hökməli və Binəqədi qəsəbələri istiqamətində Əli Tağızadə küçəsi ilə hərəkət edəcək.
Həmin marşrutlar “Şamaxinka” ərazisində, “Alov zavodu”nun qarşısındakı dayanacaqdan çıxarılacaq. Sərnişinlər Əli Tağızadə küçəsində, 2 saylı poçt filialının 134 saylı poçt şöbəsinin yaxınlığındakı dayanacaqdan istifadə edə bilərlər.
Sərnişinlər hansı dayanacaqlara getməlidirlər?
Sumqayıt istiqamətinə gedənlər Moskva prospekti 6 ünvanındakı dayanacaqdan və ya “Şamaxinka”da “Alov zavodu”nun qarşısındakı məntəqədən istifadə edə bilərlər.
Pirəkəşkül və Müşfiqabad istiqamətinə gedən sərnişinlər üçün isə “20 Yanvar” metrostansiyasının Müzəffər Həsənov küçəsindəki çıxışında, ADSEA binasının qarşısındakı dayanacaq və “Şamaxinka”dakı müvafiq məntəqə nəzərdə tutulub.
AYNA-nın məlumatına görə, dəyişikliklər ictimai nəqliyyatın hərəkətini sürətləndirmək, yollardakı hərəkəti optimallaşdırmaq və sərnişinlərin rahatlığını artırmaq məqsədi daşıyır.