Hematogen dəmir çatışmazlığının müalicəsində dərman preparatlarını əvəz edə bilməz.

Editor.az xəbər verir ki, bu barədə “SM-Klinika”nın terapevti Aleksandra Vişnyakova bildirib.

Həkimin sözlərinə görə, hematogen cəmiyyətdə uzun illərdir hemoqlobin səviyyəsini artıran və anemiyanın qarşısını alan faydalı məhsul kimi qəbul edilir. Məhsulun tərkibində dəmir olsa da, onu dəmir çatışmazlığının profilaktikası və xüsusilə müalicəsi üçün tam vasitə hesab etmək düzgün deyil.

Mütəxəssis qeyd edib ki, klassik hematogenin əsas komponenti qara qida albuminidir. Bu zülal iribuynuzlu heyvanların qanından əldə edilir. Məhsula dad vermək üçün isə şəkər, qatılaşdırılmış süd, bəkməz və digər komponentlər əlavə olunur.

Bununla belə, müxtəlif hematogen məhsullarının tərkibi və qida dəyəri bir-birindən əhəmiyyətli dərəcədə fərqlənə bilər. Bəzi məhsullarda dəmirin miqdarı çox az olduğundan onların qida xüsusiyyətləri adi şirniyyatlardan ciddi fərqlənmir. Buna görə də hematogen alarkən məhsulun adından daha çox onun tərkibinə diqqət yetirmək vacibdir.

Həkimin sözlərinə görə, hematogendə olan dəmirin miqdarı müəyyən edilmiş dəmir çatışmazlığı anemiyasının müalicəsi üçün, bir qayda olaraq, kifayət etmir. Belə hallarda xəstəyə həkim tərəfindən müəyyən dozada dəmir preparatı təyin olunur və müalicənin nəticələri laborator analizlərlə izlənilir.

Mütəxəssis xəbərdarlıq edib ki, bir neçə hematogen batonunun qəbul edilməsi təyin olunmuş müalicəni əvəz edə bilməz. Bu zaman insan lazımi terapevtik dəmir dozasını almaq əvəzinə, daha çox şəkər və kalori qəbul etmiş olur.

Dəmir çatışmazlığı zamanı zəiflik, yuxululuq, dərinin solğunlaşması, saç tökülməsi, dırnaqların kövrəkləşməsi və əmək qabiliyyətinin azalması kimi əlamətlər müşahidə oluna bilər. Lakin bu simptomlar yalnız dəmir çatışmazlığına xas deyil. Dəqiq diaqnoz üçün qan analizləri, o cümlədən ferritin səviyyəsi və digər göstəricilər qiymətləndirilməlidir.

Həkimlər həmçinin dəmir çatışmazlığının səbəbinin müəyyən edilməsinin vacibliyini vurğulayırlar. Buna güclü menstrual qanaxma, balanssız qidalanma, mədə-bağırsaq xəstəlikləri və xroniki qan itkisi səbəb ola bilər.

Mütəxəssis hematogeni dəmir səviyyəsini artırmaq məqsədilə nəzarətsiz və həddindən artıq miqdarda qəbul etməməyi tövsiyə edib. Məhsulun tərkibindəki yüksək şəkər miqdarı çəki artımına, qanda qlükoza səviyyəsinin yüksəlməsinə və kariyesə səbəb ola bilər.

Şəkərli diabeti, karbohidrat mübadiləsi pozuntuları və məhsulun tərkibindəki komponentlərə qarşı allergiyası olan şəxslər hematogen qəbul edərkən xüsusilə diqqətli olmalıdırlar. Orqanizmdə dəmirin həddindən artıq toplandığı xəstəliklər zamanı da bu məhsuldan istifadə məhdudlaşdırılmalıdır.

Mütəxəssis uşaqlara hematogeni adi konfet kimi nəzarətsiz şəkildə verməməyi də tövsiyə edib.

//Gülnarə Abasova, Editor.az