Ermənistan Azərbaycanla enerji sahəsində əməkdaşlığın genişləndirilməsində maraqlıdır.

Editor.az-ın APA-ya istinadən verdiyi məlumata görə, bunu Ermənistan Atom Elektrik Stansiyasının baş direktoru Eduard Martirosyan Rusiya Enerji Həftəsi çərçivəsində keçirilən “3+3” platforması: “Enerji əməkdaşlığı Cənubi Qafqazda sülh və təhlükəsizliyin dayağı kimi” mövzusunda dəyirmi masada çıxışı zamanı bildirib.

Martirosyan Ermənistanın qonşu dövlətlərlə enerji sahəsində əməkdaşlıq imkanlarına toxunub. Azərbaycanla münasibətlərə dair danışan erməni rəsmi artıq həyata keçirilmiş yanacaq tədarüklərini xatırladıb.

O, gələcəkdə Azərbaycanla elektrik enerjisi tədarükünün də mümkün ola biləcəyini vurğulayıb.

Ermənistan Atom Elektrik Stansiyasının rəhbəri ölkəsinin İran və Gürcüstanla yanaşı, perspektivdə Azərbaycanla da enerji sahəsində əməkdaşlığı inkişaf etdirmək niyyətində olduğunu bildirib.

Beləliklə, Martirosyanın açıqlamasında Azərbaycanla gələcək enerji əməkdaşlığı mümkün istiqamətlərdən biri kimi qeyd olunub. Bununla belə, elektrik enerjisi tədarükü ilə bağlı konkret razılaşmanın əldə edildiyi bildirilməyib.